Аялан дуулдаг чиний минь хоолойтой
Адилхан өнгөөр уянгалан ганганаад
Алаг нүдний сормуус шиг дэвээд
Аглаг тал дээгүүр шувууд буцлаа

Амраг минь чи дуугаа дуулаач
Аяны шувуудыг эргэтэл нь дуулаач

Хөмсгөн сарны дамжин өртөөлөх
Хөвөн үүлсийн сиймхийг чиглээд
Хөхрөн униартах тэнгэрийн хаяа руу
Хөөрөн ниссээр шувууд буцлаа

Амраг минь чи дуугаа дуулаач
Аяны шувуудыг эргэтэл нь дуулаач

Зэллэн ниссэн шувуудын цуваа
Зэрэглээ татах алсад шингээд
Чихэнд хоногшсон энэхэн дуу
Сэтгэлд шингэм уянгатай сонсогдоно

Амраг минь чи дуугаа дуулаач
Аяны шувуудыг эргэтэл нь дуулаач
Амраг минь чи дуугаа дуулаач
Аяны шувуудыг эргэтэл нь дуулаач