Мэлтэлзсэн сүү шиг сарны туяанд
Гялталзсан шүүдэр сувдан өнгөтэй
Мэлрэн хүлээх миний дотрыг
Гялайлгах цайлгах хайрт чамайгаа
Дурсан суусаар
Дуулан саатах
Зовлон биш
Зол минь гэлтэй

Сугсалзан найгах өвсний толгойд
Сувдарсан шүүдэр намрын сүртэй
Санан хүлээх миний цээжийг
Саруулсган уужлах хайрт чамайгаа
Дурсан суусаар
Дуулан саатах
Зовлон биш
Зол минь гэлтэй

Түрэлхэн дайрах үдшийн бүрийд
Түгээмэл гийсэн саран цогтой
Тэсэн хүлээх миний зүрхийг
Тэнхрүүлэн таалах хайрт чамайгаа
Дурсан суусаар
Дуулан саатах
Зовлон биш
Зол минь гэлтэй